| .. |
தமிழீழ விடுதலைப் புலிகள் இயக்கத்தின் முன்னாள் போராளிகள், ஆதர வாளர்கள், நலன் விரும்பிகளின் பங்கேற்புடன் ஜனநாயகப் போராளிகள் கட்சி உதயமாகியுள்ளது. அத்துடன் எதிர் வரும் பொதுத்தேர்தலில் வடக்கு, கிழக்கு தேர்தல் மாவட்டங்களில் தமிழ்த் தேசியக் கூட்டமைப்பின் வேட்பாளர் பட்டியலில் போட்டியிடுவதற்காக தமிழீழ விடுதலைப்புலிகளின் முன்னாள் பிரதிநிதிகளுக்கு தலா இரண்டு ஆசனங்களை வழங்கவேண்டும் என் கூட்டமைப்பிடம் கோருவதற்கும் அக்கட்சி தீர்மானித்துள்ளது. இது தொடர்பில் மேலும் தெரியவருவதாவது, முன்னாள் விடுதலைப் புலிகளின் இயக்கப் போராளிகளின் பிரதிநிதிகளும் அவர்களது ஆதரவாளர்களும், நலன்விரும்பிகளும் நேற்று வெள்ளிக்கிழமை காலை யாழ்ப்பாணத்தில் ஒன்று கூடினர்.
பொதுத்தேர்தல் நெருங்கிவரும் தற்போதைய அரசியல் சுழ்நிலையில் தாம் ஆற்றக்கூடிய, ஆற்றவேண்டிய, ஜனநாயகப் பங்குபணி குறித்து சுமார் மூன்று மணி நேரமாக ஆராய்ந்தனர். இவ்வொன்று கூடலில் யாழ்ப்பாணம், கிளிநொச்சி, முல்லைத்தீவு, மன்னார், வவுனியா, மட்டக்களப்பு மாவட்டங்களைச் சேர்ந்த சிரேஷ்ட போராளிகள் பலர் கலந்துகொண்டனர்.
இக்கூட்டத்தில் எடுத்துக்கொள்ளப்பட்ட முக்கிய தீர்மானங்கள் வருமாறு, முன்னாள் போராளிகள், அவர்களின் ஆதரவாளர்கள், நலன்விரும்பிகள் ஆகியோரை ஒன்றிணைத்து ஜனநாயகப் போராளிகள் (ஊசரளயனநசள கழச னுநஅழஉசயஉல) கட்சி என்ற அமைப்பில் அரசியல் செயற்பாடுகளில் முழு மூச்சாக ஈடுபடுவது. ஈடுபாடுடைய பேராளிகளையும் ஆதரவாளர்களையும் ஐக்கியப்படுத்தி ஒரு புதிய கட்டுறுதியான அமைப்பை ஏற்படுத்துவது. அதுவரை அமைப்பின் ஒருங்கிணைப்பாளராக என்.வித்தியாதரன் செயற்படுவார்.
தமிழ்பேசும் மக்களின் ஒட்டுமொத்த நலன்களை வென்றெடுப்பதற்காக அதிர்வுள்ள வகையில் செயற்படும் ஒரு புதிய ஜனநாயக அரசியல் கலாசாரத்தை முன்னெடுக்க வேண்டிய தேவை எழுந்துள்ளது. இதனை நோக்கமாகக் கொண்டு முன்னாள் போராளிகளும் அவர்களுக்கு உரித்தான பங்களிப்பை இவ்விடயத்தில் வழங்குவதற்கு வகை செய்யும் விதத்தில், எதிர்வரும் பொதுத் தேர்தலில் வடக்கு, கிழக்கு தேர்தல் மாவட்டங்கள் தோறும் தமது வேட்பாளர் பட்டியல்களில் விடுதலைப் புலிகளில் இயங்கிய தலா இரு முன்னாள் போராளிகளையாவது இணைத்துக்கொள்ளும்படி தமிழ்த் தேசியக் கூட்டமைப்பின் தலைமையைக் கோருதல், தமிழர்களின் உரிமைகளை ஈட்டுவதற்கான ஜனநாயக நடவடிக்கைகளில் அர்த்தமுள்ள வகையில் நேர்மையுடனும் நெஞ்சுரத்துடனும் ஈடுபட்டு, ஒரு முறையான அரசியல் தலைமைத்துவத்தை தமிழர்கள் மத்தியில் நிலைநிறுத்தல், கடந்த கால இழப்புகளினால் பாதிக்கப்பட்ட நமது மக்களின் வாழ்வாதார வளங்களைக் கட்டி எழுப்பி, புனர்வாழ்வு, புனரமைப்புப் பணிகளை உத்வேகத்துடன் முன்னெடுத்து, அரசியல் கைதிகளின் வலியை நன்கு பட்டறிந்து உணர்ந்தவர்கள் என்ற வகையில் அவர்களின் விரைந்த விடுதலைக்கு அழுத்தம் தந்து அர்த்தமுள்ள வகையில் பங்களித்தல், நீதி, நியாயமான ஜனநாயக நடவடிக்கைகளில் அர்த்த சுத்தியுடன் ஈடுபடுவதன் மூலம், தமிழ்ப்பேசும் மக்களின் இனப்பிரச்சினைக்கு நிரந்தரத் தீர்வுகாண்பதற்கு தமிழர்களுக்கும் தென்னிலங்கையின் நியாயமான அரசியல் தலைமைகளுக்கும் இடையில் பலமான இணைப்புப் பாலமாக விளங்கத்தக்க வகையில் வினைத்திறனுடனும் செயற்படுவதல், உட்பட எதிர்வரும் பொதுத் தேர்தலையொட்டி மேற்கொண்டு எடுக்கவேண்டிய தந்திரோபாய உத்திகள் குறித்தும் ஆராய்ந்து திட்டங்கள் வகுக்கப்பட்டதாக அக்கட்சி அறிவித்துள்ளது.
அதனையடுத்து அறப்போர் நிகழ்த்தி, தன்னையே ஆகுதியாக்கிய விடுதலைப்புலிகள் அமைப்பின் தியாகி திலீபன் சாகும் வரை உண்ணாவிரதம் இருந்து மரணமடைந்த நல்லூர் கோயில் வீதியில், நேற்று நண்பகல் ஒன்றுகூடி தியானம் அனுஷ்டித்தவர்கள், அதற்கு முன்னதான ஒன்று கூடலின் போது தாம் எடுத்துக்கொண்ட தீர்மானங்களை நடைமுறைப்படுத்துவதற்கு ஐக்கியப்பட்டுச் செயற்படுவதென அங்கு பிரதிக்ஞை செய்துகொண்டனர்.
தமிழரசுக்கட்சியின் தலைவருடன் இன்று மாலை முக்கிய சந்திப்பு இதேவேளை இன்று மாலை 4.30 மணிக்கு இலங்கைத் தமிழரசுக்கட்சியின் தலைவர் மாவை. சேனாதிராஜாவை அக்கட்சி முதன்முதலாக சந்திக்கவுள்ளதாக தெரிவித்துள்ளது. இச்சந்திப்பின்போது அக்கட்சியின் தீர்மானங்கள் கோரிக்கைகள் தொடர்பில் பேசப்படவுள்ளதாகவும் தெரியவருகின்றது. அதனைத் தொடர்ந்து எதிர்வரும் தினங்களில் தமிழ்த்தேசியக் கூட்டமைப்பின் தலைவர் இரா.சம்பந்தனையும் சந்திப்பதற்கு தீர்மாத்திருப்பதாகவும் கூறப்படுகின்றது
|
Saturday, 4 July 2015
 |
யாழ்ப்பாணத்தில் உதயமான ஜனநாயக போராளிகள் கட்சி |
